Pro 3 | WSK | STEP | Aga kuriang, ani munan den ka kausem mu me kamili sapurukko. Tom suen biya den ka manem mu kamin te anirukko.

Proverbs 3

Ikia nunguning mu daiga bagara yawara ka kausokko

1 Aga kuriang, ani munan den ka kausem mu me kamili sapurukko.
Tom suen biya den ka manem mu kamin te anirukko.
2 Aninga munan den umu karo tui mu asele
ni ali imi te kam maiya biya yawarakala bagerko.

3 Saki alo nunga kuera ale nunga saonga ko munan nikate aniso mu me menarukko,
munan mu kulolo iwita degetak te tugum,
ale gemang motam ningi bitar se tom suen biya uwutata anirukko.
4 Ni butata bitar, mu Kaem nika kueruk,
se ali imi te kariimet agotala nika kuemonko.
Se nika nip yawarakala anirukko.

5 Ni KARI BIYA ko ninguru gemang ningi nunguning arukko.
Ni keta ka ikia ka sangukko iwita ma me baluko.
6 Ni anapeya mel bitarko, mu KARI BIYA ko kamin tugu se la bitar asele
nu ko lage diram ka kausokko.

7 Ni keta ka ikia biya nunguningkiri ma me baluko. ^{▼▼Pro 3:7 Nainimi patowara ko munan: Pro 3:7; 6:17; 11:2; 13:10; 15:25; 16:18-19; 18:12; 21:4, 24; 27:2; 29:1, 23; 30:13, 32.}
Ni KARI BIYA kuring bowa ningi la baga se munan memek biring tuiko.
8 Ni uwutata bitar, mu munan ningo umutang mu kinin muguri nasan iwita,
ka kimik guang, ka kimik sokel, kuera ikes yaman menawurok ale sail iru kisokko.

9 Kaem mel kisam mu te nup biya tuiko.
Ale ka ningam ningi na inang yoposo mu sang gi ale ago tui ale nup patawurko.
10 Umu te ka na inang ko kuwim mu me tukunang aruk,
se ka waen mu biya tala kuring aratuk ale kapurukko.

11 Aga kuriang, tom KARI BIYA ni te giris meko ikup katir kisok, mu me ko gemang magurukko,
mu am iki ale karo tuiko.
12 Mu awuk, nuet namar ko kueso ale due iluso iwitata,
KARI BIYA nu kariimet nunga kueso mu te giris palagomonko node iwitata iluso.

13 Kari awiriya ikia nunguning taso ale ninguru ko ikiso, mu amilmilurukko.
14 Mu awuk, ikia nunguning mu silver se gold kiaram.
15 Ale manga gotektek ko koma kalel bibiya mu kiaram.
Se anapeya mel ni ko kuesam mu ikia nunguning mu karogo me terong mam tala.
16 Kam maiya biya te bagara ko mu noko kuting sengam mu te aniso,
se ko kuting ngas mu te nup biya se mel ningo ningo te aniso. ^{▼▼Pro 3:16 Hebrew alo nunga bala te mu ikia nunguning mu imet iwita: Proverbs 8 se 9.}
17 Ikia nunguning umutang ka sanguk se
bagara yawara lila ago se amilmil ago mu te bagerko.
18 Ikia nunguning imitang mu tam marak nangarso wore turan.
Se kariimet ko amilmilasan ale ko nunguning gi nasan, mu marak amilmil ago la bagomonko.

19 KARI BIYA kota ko ikia nunguning te ali imi nungam,
ale kota ko ikia biya te la taiti kuwim tuam.
20 Ale ko ikia nunguning te tala yu gagi aratu namaman anisan,
ale ko ikia nunguning te tala taiti nuwi bolala awuso se tuwik ko iwita ali imi te kaposo.

21 Aga kuriang, ikia nunguning ko munan mu ninguru ilukuawurko,
me biring ko saparko.
22 Mu ikia nunguning umutang bagara yawara, marak ningo, amilmil ago kisokko.
23 Se ni aolak ilup, mu ikup mel bo te me sorerko.
24 Ale ka anira kuwim te taga anir, mu mel bo ko me nguangerko,
ale nirung mel bo mena yawarakala aniwer se sor ukirokko.
25 Ale kariimet memek alo nongote ikup yaman tairatela aratoso,
bare ni mu ko me nguangerko.
26 Mu awuk, KARI BIYA kota ka sinar taukko.
Se ni ikup memek dagarok iwita taiwoso mu te me sorerko.

27 Awiriya mel ko tukunang aruk se ni karogo,
mu ni nu am sangaruko.
28 Se nikate mel ago agi,
mu ka bo manaru ale “kimi bita sager se ukirok se asele kisekko,” ma me baluko.

29 Nika singsang kerak pingi baga se ni nononga bo ko iwita ka ikiwasan,
mu ni munan memek bo nungumik te me bitarko.
30 Kari bo ni kimik te munan memek bo me beteso agi,
bare ni yam ipi nu ilak me den tagirko.

31 Ni tere daong kari nunga munan arik ale ni uwutatala bitarko iwita me ago kaerko. Mena.
32 Mu awuk, KARI BIYA kariimet memek betesan mu me nunga kueso.
Bare nu kariimet munan diram te bagasan mu nunga giso ale ikia nu bitirukko mu nunga kasurso.

33 Kawam suwanta ko kariimet munan memek betesan,
mu KARI BIYA ko gomang magara nongote aniso.
Bare kawam suwanta ko kariimet munan diram betesan,
mu KARI BIYA marak nungarso ale nunga sinar taso.

34 Kariimet nunumi patowasan ale saki alo nunga gusirsan,
mu KARI BIYA nuna nunga gusirso. ^{▼▼Pro 3:34 Saki alo nunga gusia ko kilek: Pro 3:34; 9:7,8,12; 11:12; 14:6; 17:5; 19:25,29; 21:11; 24:9; 29:8.}
Bare kariimet nunumi ira kutuwusan,
mu nu gomang nungarso ale nunga sangarso.
35 Kari ikia nunguning diram ago,
mu kariimet nunup patawomonko.
Bare kari ikia ningo nongote mena,
mu nongota nunumi dolara tusan.